Por: Marciano Moreira

Era un bes, tenba un omi bazofu, konxedu pa Txintxin di Maria. Mas bazofu ki el ka tenba nes Arkipelagu di Kabu Verdi interu.

Un dia, da Txintxin na kabesa di ba Mérka di briu di korpu. El kreba ba konxe Mérka, pabia tudu algen di posis sima el na zona staba so na bazofaria ma dja nbarka – kada un ta fla ma dja ba pa pais tal, enkuantu el Txintxin ta fikaba kaladu.

Txintxin, na kel tardi di dumingu, dipos di toma disizon di ba pasia Mérka, el ba papia ku se kunpadri Txiku nha Bia, omi di saberis na zona i ki, inda pur sima, dja baba Mérka ka un bes, ka dos:

– Kunpadri Txiku, vontadi dja da-m i rikursus Dios tanbe dja da-m, di manera ki dja N disidi da un saltu ti Mérka zas, pa N ba da odju bentu.

– Ah! Sin kunpadri, nhu sa ta faze dretu. Kenha ki ka pode, ka pode. Mas, pa kenha ki sta na jetu, Mérka e kabu di konxe. Ti ki nhu po pe na txon di Mérka, ideias di bida ta muda. Kuzas ki antis nhu ta pensaba ma era grandi, ta bira ta parse-nho pikinotinhu, sima furmiga.

– N ben li pa nhu orienta-m, nho ki dja ten txeu speriensia di es andansas di ba Mérka: kuze ku kuze ki N debe faze? Pasaporti, dja N tra bedju na tenpu.

– Ben. Nhu ta ba la Praia, la na Enbaixada di Mérka, nhu ta fla-s ma nhu kre un vistu di turista. Es ta marka-nho un entrivista. Ti ki txiga dia di entrivista, nhu ta ba na ora. Nton, es ta splika-nho, tintin pa tintin, kuze ku kuze ki nhu debe faze.

– Sta ben. Deus paga-nho! N ka ta para mas pabia tenpu sta-m bidjaku… – Txintxin dispidi.

Txintxin faze sima se kunpadri Txiku nha Bia konsedja-l. Txiga dia di entrivista. Txintxin bisti se midjor fatu, po se midjor perfumi, da rinkada pa Enbaixada sedu pa el pode ka txiga atrazadu. Konvensidu ma dinheru ki ta faze mundu jira, Txintxin leba un pasta xeiu di dinheru. Dinheru txeu ka poku. Filismenti, na kel tenpu inda ka tenba es moda di kasu-bodi, nen di thugs… Txiga se bes, es txoma Txintxin di Maria i el entra:

– Bon dia, sinhor Merkanu! N ka ta papia merkanu, mas purtuges, N ta jeta. Nhu ta ntende purtuges? – komesa Txintxin na purtuges ku kudadu pa ka da baraka na papia purtuges.

– Bon dia! Nhu papia kabuverdianu. N studa kabuverdianu na Mérka. Di favor, nhu xinta.

– Eh! Nhu ta ratxa kriolu sima mi…! – Txintxin komesa ta diskontrai.

– Nhu fla-m kuze ki traze-nho li?– Merkanu korta-l konbersu.

– Sin, sinhor Merkanu. Ami e omi di posis. N ka sima kes otu ki ta ba Mérka buska bida. Ta bai pa ben, mas ta subi latxi Mérka, bai ka ben mas. N ten txeu tera, animal i otus ben…

– Modi ki e nomi di-nho? – Merkanu torna korta-l konbersu, un poku nfadadu ku kel konbersu.

– Nha nomi di igreja e Joaquim Manuel de Jesus Monteiro Lopes, mas mi e mas konxedu pa Txintxin di Maria – nha nomi di kaza desdi boronseti. Nhu ali nha pasaporti.

– Sinhor Joaquim, trokadu kuze ki nhu ben papia ku mi?

– N kre ba konxe Mérka. Fladu ma tera di-nho e sabi. Mas, sima N fla-nho, N pode fla ma mi e riku. Pa nhu ka pensa ma N sa ta konta ka-si, nhu odja li. – Txintxin di Maria abri se pasta xeiu ti boka di notas santadu – dinheru kabuverdianu misturadu ku dinheru di Mérka i di otus pais.

– Ka era nisisariu nhu traze ku nho tantu dinheru. Alias, pa mostra ma nhu ten rikursus pa suporta turismu la Mérka ten otus manera, sima diklarason di dipozitu na banku, diklarason di rendimentu anual di Finansas, etc. – Merkanu dispara, un poku xatiadu ku kes skizitisi di Txintxin.

– Sinhor Merkanu, ami go dipozitu na banku, N ka ten. Nen diklarason di rendimentu di Finansas. Ami, so N ta paga desima na Finansas. Sin, kel la, N ta paga tudu anu. Mas, ami, sima dja N fla-nho, N kre ba Mérka so da odju bentu txas, pa N volta. N ka ten nisisidadi di ba Mérka.

Merkanu dja staba xeiu di bazofaria di Txintxin. Merkanu longa Txintxin pasaporti:

– Nhu toma pasaporti di-nho. Nhu pode ba kaza. Nhu volta li so ti ki nhu ten nisisidadi…

Sapatinha ribera riba, sapatinha ribera baxu, kenha ki sabe mas, konta midjor!

Marsianu nha Ida padri Nikulau Ferera