Por: Marciano Ramos Moreira*

Era un bes na un mesmu andar di un prediu, tenba 2 apartamentu ku 2 familia: Txiku ku nha Maria i Txatxa ku nha Xepa. Konjujis di es 2 familia staba kada un ku 40 i tal anu di idadi. Es 2 familia era bons vizinhu.

Mas, kel noiti, Txiku sai na parodia. Na kel epuka, ti ki Txiku saiba na parodia, el ta voltaba normalmenti so dentu ta manxe. Nha Maria apruveita pa anda Txiku mal, prisizamenti ku se amigu i vizinhu Txatxa.

Banda meia-noiti, nha Maria ku se amanti Txatxa staba dentu kuartu di es nha Maria so na pega kunpanheru kantu, di rapenti, es xinti Txiku ta abri porta:

– Fika na kel kantu la, N ta baza-bu oliu i kubri-bu ku farinha trigu. Bu ta finji ma bo e statua pabia nu ka ten otu manera di skapa! – nha Maria fla se amanti, enkuantu el nha Maria sa ta traba di guarda-fatu oliu ku farinha ki el teneba sukundidu.

Nha Maria, sima el fla, asi ki el faze nun uas.

Txiku entra, pasa alguns minutu na otus dipendensia di apartamentu i, na fin, bai kuartu:

– Maria, kel la e kuze? – Txiku purgunta, ta ponta dedu pa Txatxa, ki staba imovel bu ta fla statua, kubertu di farinha.

– E un statua ki N kunpra. Ka dura li, N ba kaza di Xepa, N atxa-l ku un statua sima kel la… N gosta, N kunpra tanbe.

Txiku ka fla nen po nen pedra. El bai kuzinha, el volta ku 2 garafa di serveja:

– Kunpadri Txatxa, nhu toma un serveja. Kel dia, nhu atxa-m na kuartu di-nho sima statua, nhu dexa-m la stikadu noiti manxe, nhu bebe serveja di-nho nha frenti, nhu ka da-m nen un garafa! Kadera largu!

Nha Maria, xeiu di burgonha i dizorientada, sai ta kore pa apartamentu di Xepa. Kantu el volta ku Xepa pegadu na mon, es atxa ses maridu na sala so na toma ses serveja, sima 2 amigu, ki, alias, senpri es foi. Nton, Xepa ku Maria kalma tanbe, ba kuzinha toma xa.

Na dias siginti, ningen ka toka na kel asuntu di kes 2 statua na kel andar.

Mas Txatxa fika mutu tristi. El ka speraba ma se mudjer ta poba-el txifri. Na verdadi, el dexa di gosta di se mudjer. El ka sa ta aguentaba mas odja se mudjer propi. El bai konta se irmon Txibita. Nton, Txibita fla-l:

– Manu Txatxa, si bu kre libra di bu mudjer, N ten un konsedju pa N da-bu.

– Fla-m li faxi!

– Pega-l tudu santu dia duranti 30 dia. Si el txiga 30º dia ku bida, el ka ta pasa di la di serteza. El ta more, asin bu ta libra del.

Txatxa volta pa kaza kontenti – ti ki enfin dja el atxa soluson pa se prublema! Sima el konsedjadu, asi ki el faze.

Mas kuza stranhu bira ta kontise: na nves di Xepa nfrakise pa more, Txatxa ki sa ta fikaba kada dia ku kurba mas fraku; Xepa staba kada bes mas alegri, kada bes ku mas briu.

Kantu es ta entra na 16º dia nes brinkadera, Txatxa fika ta ten difikuldadi ti di subi skada. Xepa da konta, ben karega Txatxa:

– Oxi, N ta da-bu kaldu mas forti pabia sinon bu ka ta konsigi kontinua ta da konta di rekadu sima bu ten stadu ta da ultimamenti. Oi, forti sabi! Si bu kontinua asi, nen bu ka meste priokupa ku statuas…

– Axa, abo ki ta mata-m! Manhan, N ta leba-bu bus djenti grandi. Ami, bu ka ta mata! I nen N ka ta parse ku boi… – riaji, rizignadu, Txatxa.

Kel otu dia me, Txatxa poi Xepa dianti, rostu pa kaza di pai ku mai di Xepa:

– Nhu Txutxi ku nha Txontxa, N ben traze-nhos fidju femia di-nhos pabia el sa ta santa-m txifris na testa, ki N ka sa ta pode labanta rostu na rua.

– Nha fidju matxu, ka bu dizanima! Odja-m li: ami, N ka dizanima ku se mai, Txontxa. Spera ti ki Xepa bira bedja sima se mai sta gosi li, el ta branda. Se mai me era asi!

Marsianu nha Ida padri Nikulau Ferera